Festas e mercados

A Feira Medieval de Noia, unha das máis coñecida de Galicia, é unha cita obrigada para todos os amantes  desta clase de eventos. Celébrase cada ano a mediados de xullo e durante unha fin de semana aproveita as rúas, prazas e edificios do casco histórico noiés para recrear o ambiente da vida no medievo.

Noia Jazz, o Festival Internacional de Música Jazz da Vila de Noia, ten lugar cada ano a mediados de agosto na Praza da Constitución, e reúne aos mellores grupos de jazz de España e do panorama musical internacional.

A empanada de Noia é, xunto co berberecho, unha das estrelas gastronómicas da vila e de toda a comarca. Por isto, dende 1979 e coincidindo coas festas patronais de San Bartolomeu, celébrase a Festa da Empanada en homenaxe a este manxar tradicional.

As xornadas de exaltación do berberecho de Noia, organizadas pola Confraría de Pescadores San Bartolomeu, teñen lugar durante o mes de outubro co obxectivo de dar a coñecer e poñer en valor este produto estrela da gastronomía noiesa.

Con máis de vinte edicións ás súas costas, a Mostra de Curtas Vila de Noia é un dos eventos máis importantes do panorama audiovisual galego e un acontecemento de gran relevancia cultural e cinematográfica, que se celebra cada ano no municipio entre outubro e novembro.

O Festival Internacional de Arpa “Vila de Noia” reúne, edición tras edición, aos mellores arpistas do panorama nacional e internacional, con artistas chegados dende países de todo o mundo.

O Rali de Noia, que se celebra cada ano durante o mes de abril, é unha das citas máis emblemáticas do calendario do motor galego.

As festas de San Bartolomeu son unha das citas imprescindibles do verán galego. Celebradas cada ano a finais de agosto, o programa recolle numerosas actividades para todos os públicos.

As festas patronais de San Marcos celébranse cada ano en Noia a finais do mes de abril coincidindo co día 25, día propio da festividade de San Marcos.