Desde o Concello de Noia dámosvos a benvida á nova web de turismo da nosa localidade, un portal que, esperamos, sirva de xanela para todas as persoas que queiran asomarse a coñecer a oferta turística ou saber máis sobre a nosa vila antes, durante ou despois dunha visita.
En www.noiaturismo.com atoparedes unha web contemporánea divida en cinco seccións diferentes que farán que a navegación sexa moi intuitiva e a procura de información sinxela e rápida: coñece a nosa vila, emociónate, planifica a túa viaxe, axenda e actualidade.
Na sección “Coñece a nosa vila” presentámosvos os recursos turísticos que non podedes perdervos cando veñades visitarnos. Para facilitar a súa procura, organizáronse en diferentes grupos temáticos (festas e mercados, patrimonio, natureza e paisaxe, gastronomía, praias, portus apostoli e museos e centros de interpretación, a nosa historia) que fan que poidades atopar todos os datos e curiosidades do noso municipio, elemento por elemento e a golpe de click. Unha auténtica visita guiada ao longo e ancho da nosa localidade convertida nunha experiencia interactiva que poderedes levar a cabo desde as pantallas dos vosos ordenadores, tabletas ou móbiles grazas ao seu deseño responsive, que se adapta a calquera dispositivo.
Pero ademais de coñecer os nosos recursos, desde Turismo de Noia queremos tamén que a vosa visita sexa divertida e se adapte completamente aos vosos gustos. Por iso, no apartado “Emociónate” propoñémosvos unha serie de plans e rutas ao longo do noso municipio que poderedes escoller dependendo de se viaxades en familia ou se vides para probar os mellores produtos da nosa gastronomía; de se vos apetece practicar actividades de aventura ou preferides unha viaxe máis relaxada empapándovos do espírito do turismo slow; ou de se chegades buscando gozar do amplo programa de eventos e actividades culturais que se organizan na nosa vila durante todo o ano.
Sexa cal sexa o plan polo que vos decantedes, para organizar a vosa viaxe sabemos que necesitaredes acceder a unha serie de datos crave sobre o noso municipio. Na sección “Planifica a túa viaxe” atoparedes toda a información que estades a buscar, como as direccións dos principais edificios públicos ou os servizos de transporte, os horarios e costumes da nosa comarca, a localización e horario da oficina de turismo ou un directorio cos principais aloxamentos e locais de hostalería e lecer da vila.
Ademais, na nosa web atoparedes tamén unha axenda cultural actualizada con todos os eventos e actividades de interese que se celebrarán nas datas próximas á vosa visita, e unha sección de actualidade na que atoparedes curiosidades, novas propostas e información ampliada sobre o Concello de Noia.
Desde Turismo de Noia esperamos que o contido da nosa páxina vos sexa de utilidade, que gocedes coñecendo os segredos do noso municipio e, sobre todo, poder recibirvos moi pronto na nosa vila. Esperámosvos en Noia!
Rúa Galicia, 8
De luns a Domingo de 10:00 a 15:00