NOIA E ARREDORES

Saíndo do centro de Noia dirección suroeste, atopámonos co monte San Lois. Na súa cima, a 363 metros de altitude, pódese gozar dun miradoiro con fantásticas vistas ao centro de Noia e a boa parte da Ría de Muros-Noia. Ademais, na súa subida poderás atopar unha área de recreo, na que poderás deterte a planificar ben a ruta do día ou descansar tras unha longa xornada de paseo se te achegas a última hora.

Dirixíndonos agora ao outro extremo da vila atopámonos con esta ponte medieval que,  salvando o río Tambre, une e serve de límite entre os concellos de Outes e Noia. Crese que foi construído durante o reinado de Alfonso IX e que é un dos máis longos de Galicia (270 metros). Está sostido por 20 arcos, aínda que orixinariamente eran 27.

De Ponte Nafonso dirixirémonos ao encoro do Tambre, que acolle espazos naturais de imprescindible visita e monumentos históricos como a Central Hidroeléctrica do Tambre, de estilo  románico-industrial e construída en 1932. Actualmente, parte das instalacións da Central convertéronse en hotel. No edificio central instalouse un centro interpretativo, onde poderás coñecer a importancia das  lampreeiras e a captura da  lamprea na zona.

Se che apetece camiñar, pasando a central atoparás unha zona con mesas (no que poderás facer unha parada para recargar forzas tras o paseo) e unha ponte colgante desde a que se poden facer 3 rutas de sendeirismo de diferente grao de dificultade e nas cales poderás gozar do río Tambre en todo o seu esplendor.

Tras descansar ás beiras do Tambre, e se aínda che apetece, recomendámosche achegarte ao veciño  Concello de Lousame e visitar a  Fervenza de San Xusto de Toxosoutos. Accédese a ela a través dunha ruta de sendeirismo que parte do Mosteiro de Toxosoutos, en cuxos arredores atoparemos unha área recreativa onde poderemos descansar tras finalizar a ruta. Durante a mesma, a maiores da  Fervenza de San Xusto, poderás descubrir a antiga fábrica de papel das  Maceiriñas, restos dalgúns muíños e algún que outro salto de auga máis pequeno.