Noia “mirando ao norte”

Comezaremos a ruta no  Concello de Outes, e máis concretamente na pequena praia de  Broña. É unha praia perfecta para familias debido á tranquilidade das súas augas e, debido á súa proximidade coa capital galega, unha das principais praias á que os veciños de Santiago se escapan na época estival para gozar dun intre de relax xunto ao mar.

Sen saír do  Concello de Outes dirixirémonos á vila de Ribeira  do Freixo, coñecida como o porto de Noia. Nela atoparemos estaleiros e talleres navais de ribeira. En especial, podemos ver vestixios da carpintería de ribeira, industria típica da zona e cuxa historia se quere recuperar a través da ruta dos Carpinteiros cos pés mollados. Esta zona tamén é moi coñecida pola súa gastronomía, especialmente por bivalvos como o berberecho e a ostra.

Desde Ribeira  do Freixo continuaremos pola estrada ata chegar ao  Concello de Muros, máis concretamente á parroquia de Abelleira. Trátase dunha zona moi tranquila, con varias calas e praias que esconden importantes bancos marisqueiros. Entre elas destaca a praia de Abelleira, na que se forma un estuario separado do mar por unha lingua de area cuberta de piñeiros, o que lle dá certa singularidade. Ademais, esta praia, debido á tranquilidade das súas augas e á pouca profundidade das mesmas, é perfecta para os máis pequenos da casa.

Do mesmo xeito que Noia, esta vila mariñeira foi declara Conxunto Histórico en 1970. Mantén case intacto o seu armazón medieval no que poderás atopar igrexas, fontes e numerosos cruceiros da época. Non te podes ir de aquí sen visitar a actual igrexa parroquial de San Pedro de Muros, cuxa portada principal pertence á antiga Igrexa de Santa María do Campo do S. XII; nin o Muíño  do Pozo de  Cachón, o segundo máis grande de Galicia e un dos máis importantes de Europa.

Continuando o camiño cara ao norte, e sen saír do  Concello de Muros, atopámonos co Monte e a Lagoa de Louro. O monte, cos seus 241 metros de altura parece saído directamente do mar e dá a sensación de ter dúas chepas. Aos seus pés, e encerrada pola praia de Area  Maior, atopamos a Lagoa de  As  Xarfas, cunha gran variedade de flora e fauna. Se che gustan as paisaxes naturais virxes non deixes de pasar por aquí.

De Monte Louro dirixirémonos ao  Concello de Carnota, máis concretamente á praia que recibe o seu nome e que está considerado o areal máis extenso de Galicia (7 km) e un dos máis bonitos debido á súa forma de media lúa. Este areal está precedido por unha lagoa protexida, polo que para acceder á praia debemos percorrer unha pasarela de madeira. Non podes finalizar esta ruta sen realizar un longo paseo por esta praia virxe.

E deste paraíso natural dirixirémonos á Fervenza do Ézaro ou do Xallas, nome do río que dá lugar á fervenza. Nesta fervenza a auga do río cae desde 40 metros de altura para desembocar directamente no mar, o que a fai única na Península Ibérica. Aínda que o mellor momento para visitalo é o inverno, debido ás numerosas precipitacións que carrean a apertura de comportas da presa, podedes achegarvos ata alí en calquera momento do ano xa que desde o 2011 sempre leva auga. Que mellor sitio para finalizar esta ruta que deixándote envolver polo ruído da auga caendo sobre as paredes do canón? E se aínda che queda tempo, deberías subir ata o miradoiro e gozar dunhas preciosas vistas do océano Atlántico, o Monte Pindo e Fisterra.