Nesta igrexa gótica atópase unha exposición de lápidas sepulcrais ou laudas de diferentes gremios profesionais e status sociais da vila que datan dende a época medieval ata a Idade Moderna. No cemiterio lindeiro ao templo, atópase un cruceiro gótico cuberto por un baldaquino (século XVI), coñecido como o Cristo do Humilladoiro e máis de catrocentas tumbas gravadas.
Con ánimo de mostrar unha selección, tanto tipolóxica como cronolóxica dos fondos, a exposición organízase do seguinte modo.
- Laudas con representacións profesionais ou gremiais: caracterizadas pola aparición de ferramentas identificábeis do gremio no que traballaba o defunto. Entre estas temos laudas con oficios de mariñeiros, canteiros, carpinteiros de ribeira, zapateiros, xastres, entre outras profesións.
- Laudas con marcas familiares: sinalan de modo máis concreto, marcas a modo de firmas identificábeis das familias. Estas marcas pasan de pais a fillos e, ás veces, poden aparecer asociadas a ferramentas do oficio que utilizaba en vida o defunto.
- Laudas con motivos heráldicos e epigráficos nos que figura o brasón familiar do representado.
- Laudas con tema antropomorfos: a figura humana na súa principal decoración.
Rúa Galicia, 8
De luns a Domingo de 10:00 a 15:00